தமிழ்நாடு பள்ளி கல்வித் துறை, அரசு பள்ளி ஆசிரியர்கள் "மணற்கேணி" செயலியை வகுப்பறை கற்றல் செயல்பாட்டில் கட்டாயமாக பயன்படுத்த வேண்டும் என்று அறிவித்துள்ளது. தொடக்கக் கல்வித் துறை இயக்குநரகத்தின் உத்தரவில், அனைத்து ஆசிரியர்களும் "மணற்கேணி" செயலியை அல்லது https://manarkeni.tnschools.gov.in என்ற இணையதளத்தைப் பயன்படுத்தி வகுப்பறை கற்றலுக்காக காணொளி மற்றும் கற்றல் வளங்களை பதிவிறக்கம் செய்ய வேண்டும் என்று கூறப்பட்டுள்ளது.
அதே நேரத்தில், பள்ளி மாணவர்களின் பெற்றோர்களிடமும் "மணற்கேணி" செயலியின் முக்கியத்துவம் குறித்து விழிப்புணர்வு ஏற்படுத்த வேண்டும் என அறிவுறுத்தப்பட்டுள்ளது. மாநில கல்வியியல் ஆராய்ச்சி மற்றும் பயிற்சி நிறுவனம் உருவாக்கியுள்ள கல்வி தொடர்பான காணொளிகள் பாடத்திட்டத்துடன் இணைந்து ஆசிரியர்களால் வகுப்பறையில் பயன்படுத்தப்பட வேண்டும்.
இதற்காக மாவட்ட மற்றும் வட்டாரக் கல்வி அலுவலர்கள் செயலியின் பயன்பாட்டை கண்காணிக்க உத்தரவிடப்பட்டுள்ளதுடன், பிப்ரவரி மாதம் முதல் அரசு தொடக்க மற்றும் நடுநிலைப் பள்ளிகளில் கணினி மூலம் கற்றல் செயல்பாடுகள் தொடங்கப்பட வேண்டும் எனவும் குறிப்பிடப்பட்டுள்ளது.
இந்த நடவடிக்கையின் மூலம், கல்வியில் நவீன தொழில்நுட்பங்களை ஒருங்கிணைத்து மாணவர்களின் கற்றல் அனுபவத்தை மேம்படுத்துதல் என தமிழ்நாடு பள்ளி கல்வித் துறை எதிர்பார்க்கிறது.
