பைட் கிளப் படத்தின் மூலம் தயாரிப்பாளராக அறிமுகமான லோகேஷ், தற்போது நடிகர் ராகவா லாரன்ஸ் கதாநாயகனாக நடிக்கும் 'பென்ஸ்' படத்தை தயாரித்து வருகிறார். மேலும், சமீபத்தில், தனது அடுத்த தயாரிப்பை அறிவித்து, 'மிஸ்டர் பாரத்' என்ற புதிய படத்தை தயாரிப்பதாக கூறியுள்ளார். இந்த படத்தில் பிரபல யூடியூபர் பாரத் கதாநாயகனாக நடிக்கிறார், இயக்குனர் நிரஞ்சன் இப்படத்தை இயக்குகிறார்.
இப்படத்தில் சமீபத்தில் வெளியான பர்ஸ்ட் லுக் போஸ்டரில், பாரத்தின் கதாபாத்திரம் பற்றிய விவரங்களை இயக்குனர் நிரஞ்சன் பகிர்ந்துள்ளார். அவர் கூறியபடி, "ஒரு வருடத்திற்கு முன்பு, நாங்கள் லோகேஷ் அண்ணாவைச் சந்தித்து, ஒரு படம் செய்வது பற்றி கூறினோம். உடனே அவர் எங்களுடன் இணைந்தார். இந்த கதையின் மையம், எந்த பெண்ணிடமும் காதல் சொல்லத் தெரியாத கதாநாயகன் பாரத், எப்படி ஒரு பெண்ணை காதலிக்கிறார் என்பதைப் பற்றி தான்" என்றார்.
இப்படத்தில் 'கட்சி சேர' புகழ் சம்யுக்தா விஸ்வநாதன், பால சரவணன், நிதி பிரதீப், லிங்கா, ஆதித்யா கதிர் ஆகியோர் முக்கிய கதாபாத்திரங்களில் நடிக்கின்றனர்.
