விஜய் ஆண்டனி திரைத்துறையில் தனது பயணத்தை இசையமைப்பாளராகத் தொடங்கினார். ‘காதலில் விழுந்தேன்’ திரைப்படத்தில் ‘நக்முகா’ என்ற பாடல் இவருக்கு மிகப்பெரிய புகழைப் பெற்றுக் கொடுத்தது. அதன்பிறகு, ‘வேட்டைக்காரன், அங்காடி தெரு’ உள்ளிட்ட பல்வேறு வெற்றிப் படங்களுக்கு இசையமைத்து பிரபலமானார். பின்னர், ‘நான்’ திரைப்படத்தின் மூலம் கதாநாயகனாக அறிமுகமான அவர், அதன்பின் ‘சைத்தான், காளி, பிச்சைக்காரன்’ போன்ற படங்களில் நடித்துள்ளார். பிச்சைக்காரன் படம் மிகப்பெரிய வெற்றியைப் பெற்றதன் மூலம், விஜய் ஆண்டனி தமிழ் சினிமாவின் முன்னணி நடிகர்களில் ஒருவராக மாறினார்.
சமீபத்தில், அவர் நடித்த ‘ரோமியோ, மழை பிடிக்காத மனிதன், ஹிட்லர்’ போன்ற படங்கள் எதிர்பார்த்த அளவிலான வெற்றியைப் பெறவில்லை. ஆனால், அவரது ரசிகர்கள் அவரிடமிருந்து புதிய முயற்சிகளை எதிர்பார்த்து வருகின்றனர். தற்போது, அவரது 22வது திரைப்படமான ‘ககன் மார்கன்’ விரைவில் வெளியிடப்பட உள்ளது.
இந்நிலையில், விஜய் ஆண்டனியின் 25வது படம் அதிகாரப்பூர்வமாக அறிவிக்கப்பட்டுள்ளது. இப்படத்தை விஜய் ஆண்டனி தயாரிக்க, அருண் பிரபு எழுதி இயக்குகிறார். இப்படத்திற்கு ‘சக்தித் திருமகன்’ என பெயரிடப்பட்டுள்ளது. மேலும், இந்த திரைப்படம் தமிழ் மட்டுமின்றி, தெலுங்கு, மலையாளம், கன்னடம், இந்தி ஆகிய மொழிகளிலும் ‘பராஷக்தி’ என்ற பெயரில் வெளியிடப்பட உள்ளது.
இந்த படத்தின் கதைக்களம் மற்றும் படக்குழுவினரைப் பற்றிய தகவல்கள் விரைவில் அதிகாரப்பூர்வமாக அறிவிக்கப்படும். ரசிகர்கள் இப்படத்திற்காக ஆவலுடன் எதிர்பார்த்து வருகின்றனர்.
