அரியலூர் மாவட்டத்தின் வரணம்புதூர் கிராமத்தை சேர்ந்த விவசாயி சீனிவாசன், வரண்ட நிலத்தில் குளிர் பிரதேச காய்கறிகளை விளைவித்து புதிய பாதையை உருவாக்கியுள்ளார். வழக்கமாக குறைந்த வெப்பநிலை மற்றும் ஈரப்பதம் அதிகமாக உள்ள பகுதிகளில் மட்டுமே வளர்க்கப்படும் காய்கறிகளை, வறண்ட நிலத்திலும் வெற்றிகரமாக பயிரிட்டது பலரின் கவனத்தை ஈர்த்துள்ளது.
மூன்று மாதங்களுக்கு முன்பு தனது கரிசல் நிலத்தில் விவசாயத்தை புதுமையான முறையில் மேற்கொள்ள முடிவு செய்த சீனிவாசன், மண்ணின் தன்மை மற்றும் நீர்ப்பாசன முறைகளில் சிறப்பு கவனம் செலுத்தினார். முதற்கட்டமாக, நாற்று தயாரிப்பு மற்றும் விதைத் தேர்வில் கூடுதல் கவனம் செலுத்தி, தரமான விதைகளை வெளிமாநிலங்களில் இருந்து பெற்றார்.
இந்த முயற்சியின் ஒரு பகுதியாக, முட்டைக்கோஸ், காலிஃபிளவர் மற்றும் காரட் போன்ற குளிர் பிரதேச காய்கறிகளை சிறிய பரப்பளவில் பயிரிட்டார். சொட்டு நீர்ப்பாசன முறை, உயிரியல் உரங்கள் மற்றும் மண் ஈரப்பதத்தை பாதுகாக்கும் நவீன தொழில்நுட்பங்களை பயன்படுத்தி பயிர்களை வளர்த்தார். இதன் மூலம் குறைந்த நீர் பயன்பாட்டில் அதிக விளைச்சலை பெற முடிந்ததாக அவர் தெரிவித்தார்.
இந்த காய்கறிகள் தற்போது அறுவடைக்கு தயாராகி வரும் நிலையில், அருகிலுள்ள விவசாயிகள் மற்றும் வேளாண் துறை அதிகாரிகள் அவரது வயலுக்கு நேரில் வந்து பார்வையிட்டுள்ளனர். வரண்ட பகுதிகளில் விவசாயம் செய்யும் விவசாயிகளுக்கு இது ஒரு புதிய நம்பிக்கையை அளிப்பதாக அவர்கள் தெரிவித்தனர்.
சீனிவாசன் கூறுகையில், சரியான பயிர் தேர்வு, மண் மேலாண்மை மற்றும் நீர்ப்பாசன முறைகளை பின்பற்றினால், வறண்ட மற்றும் வெப்பம் அதிகமான பகுதிகளிலும் குளிர் பிரதேச காய்கறிகளை விளைவிக்க முடியும் என்றார். மேலும், இந்த முறையை பிற விவசாயிகளும் பின்பற்ற வேண்டும் என்றும், இது விவசாய வருமானத்தை உயர்த்த உதவும் என்றும் அவர் நம்பிக்கை தெரிவித்தார்.
இந்த முயற்சி, விவசாயத்தில் புதிய தொழில்நுட்பங்களை பயன்படுத்துவதன் அவசியத்தை எடுத்துக்காட்டுகிறது. காலநிலை மாற்றம் மற்றும் நீர் பற்றாக்குறை போன்ற சவால்களை எதிர்கொள்ளும் சூழலில், சீனிவாசன் போன்ற விவசாயிகளின் புதுமை முயற்சிகள் முக்கியத்துவம் பெறுகின்றன. எதிர்காலத்தில் இந்த முறையை விரிவுபடுத்தி, அதிக பரப்பளவில் காய்கறி பயிரிட திட்டமிட்டுள்ளதாக அவர் கூறினார்.
