சென்னை மற்றும் அதன் புறநகர் பகுதிகளில் மாலை நேரத்தில் திடீரென பெய்த கனமழை, கடந்த சில நாட்களாக நிலவிய கடும் வெப்பத்திற்கு தற்காலிக நிவாரணமாக அமைந்தது. பகல் முழுவதும் கடும் வெயில் நிலவிய நிலையில், மாலை நேரத்தில் வானம் மேகமூட்டத்துடன் காணப்பட்டு, பலத்த காற்று மற்றும் இடி மின்னலுடன் கனமழை பெய்தது. இதனால் நகரின் பல பகுதிகளில் வெப்பநிலை கணிசமாக குறைந்து, மக்கள் நிம்மதி அடைந்தனர்.
சென்னையின் பல்வேறு பகுதிகளில் அரை மணி நேரத்திற்கும் மேலாக தொடர்ந்து மழை பெய்தது. தாம்பரம், பல்லாவரம், குரோம்பேட்டை, சேலையூர், முடிச்சூர், பெருங்களத்தூர், வண்டலூர், சிட்லபாக்கம் உள்ளிட்ட பகுதிகளில் மழை தீவிரமாக பதிவானது. பல இடங்களில் சாலைகளில் மழைநீர் பெருக்கெடுத்து ஓடியதால் வாகன ஓட்டிகள் மெதுவாக பயணிக்க வேண்டிய நிலை ஏற்பட்டது.
தாழ்வான பகுதிகளில் மழைநீர் தேங்கியதால் சில இடங்களில் போக்குவரத்து பாதிக்கப்பட்டது. முக்கிய சாலைகளில் வாகனங்கள் மெதுவாக நகர்ந்ததால் போக்குவரத்து நெரிசலும் ஏற்பட்டது. இருப்பினும் நீண்ட நாட்களாக வாட்டி வந்த வெப்பம் குறைந்து குளிர்ச்சியான காலநிலை நிலவியதால் பொதுமக்கள் மகிழ்ச்சி தெரிவித்தனர்.
திருவள்ளூர் மாவட்டத்தின் பூண்டி, கச்சூர், ஊத்துக்கோட்டை மற்றும் சுற்றுவட்டாரப் பகுதிகளிலும் மிதமான மழை பெய்தது. இந்த மழையால் விவசாயிகளும் பொதுமக்களும் மகிழ்ச்சி அடைந்துள்ளனர். நிலத்தின் வெப்பம் குறைந்ததுடன், காற்றின் ஈரப்பதமும் அதிகரித்துள்ளது.
அதேபோல் செங்கல்பட்டு மற்றும் அதன் சுற்றுவட்டாரப் பகுதிகளிலும் இடி மின்னலுடன் கூடிய கனமழை பதிவானது. மறைமலை நகர், சிங்கப்பெருமாள் கோவில், பரனூர், மகேந்திரா சிட்டி, காட்டாங்குளத்தூர் உள்ளிட்ட பகுதிகளில் மழை பெய்ததால் சுற்றுப்புறம் குளிர்ச்சியாக மாறியது. பல இடங்களில் சாலைகளில் மழைநீர் தேங்கியதால் வாகன போக்குவரத்து பாதிக்கப்பட்டது.
மழை காரணமாக சில முக்கிய சாலைகளில் போக்குவரத்து நெரிசல் ஏற்பட்டதால் அலுவலகங்களில் இருந்து வீடு திரும்பியவர்கள் சிரமம் அனுபவித்தனர். எனினும் கடும் வெயிலின் தாக்கம் குறைந்து குளிர்ச்சியான சூழல் நிலவியதால் பொதுமக்கள் பெரும் நிம்மதி அடைந்தனர்.
தமிழகத்தின் பல பகுதிகளில் வெப்பச்சலனம் மற்றும் வளிமண்டல மாற்றங்களின் காரணமாக அடுத்த சில நாட்களிலும் மாலை மற்றும் இரவு நேரங்களில் மழை பெய்யும் வாய்ப்பு இருப்பதாக வானிலை ஆய்வு மையம் தெரிவித்துள்ளது. இதனால் பொதுமக்கள் வானிலை அறிவிப்புகளை தொடர்ந்து கவனித்து, இடி மின்னலின் போது பாதுகாப்பு முன்னெச்சரிக்கை நடவடிக்கைகளை மேற்கொள்ளுமாறு அதிகாரிகள் அறிவுறுத்தியுள்ளனர்.