தென்கிழக்கு வங்கக்கடலில் உருவான ஆழ்ந்த காற்றழுத்த தாழ்வு பகுதி இன்று காலை 8.30 மணியளவில் வலுப்பெற்று, தென்மேற்கு மற்றும் தென்கிழக்கு வங்கக்கடல் பகுதிகளில் நிலவுகிறது. இது அடுத்த 24 மணி நேரத்தில் மேற்கு-வடமேற்கு திசையில் இலங்கை-தமிழக கடலோரப்பகுதிகளுக்கு நகரக்கூடும். இதனால் இன்று, கடலோர தமிழகத்தில் சில இடங்களில் மற்றும் உள்தமிழகத்தில் சில இடங்களில், புதுவை மற்றும் காரைக்கால் பகுதிகளிலும், இடி, மின்னலுடன் கூடிய மிதமான மழை பெய்யக்கூடும். மயிலாடுதுறை, நாகப்பட்டினம், தஞ்சாவூர், திருவாரூர், கடலூர் மாவட்டங்களில் கனமழை பெய்ய வாய்ப்பு உள்ளது.
நாளை, 12-ந்தேதிக்கு தமிழகத்தில் பல இடங்களில், புதுவை மற்றும் காரைக்காலிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். சில பகுதிகளில் கனமழையும், அடுத்த சில நாட்களில் 13-ந்தேதி மற்றும் 14-ந்தேதியும், தென்கிழக்குப் பகுதியில் கனமழை மற்றும் மிதமான மழை பெய்ய வாய்ப்பு உள்ளது.
சென்னை மற்றும் அதன் புறநகரங்களில், அடுத்த 24 மணி நேரத்தில், ஓரளவு மேகமூட்டத்துடன், சில பகுதிகளில் லேசானது முதல் மிதமான மழை பெய்யக் கூடும். 24 மணி நேரத்தில், 30°C மற்றும் 25°C வரை வெப்பநிலை நிலவக்கூடும்.
