கடலுார், பண்ருட்டி அடுத்த விழமங்கலத்தை சேர்ந்த மாற்றுத்திறனாளி மாணவர் கார்த்திக், 23, ஒரு சிறந்த தடகள வீரராக விளங்குகிறார். தனியார் கல்லூரியில் முதுகலை இரண்டாம் ஆண்டு கணிதம் படிக்கும் கார்த்திக், பள்ளிக்காலம் முதலே ஓட்டப்பந்தயம், நீளம் தாண்டுதல் போன்ற தடகள போட்டிகளில் பங்கேற்று சாதனைகள் படைத்துள்ளார்.
2023ம் ஆண்டில், அண்ணாமலை பல்கலைக்கழக மண்ட விளையாட்டு போட்டிகளில் 400 மீட்டர் தடைதாண்டும் ஓட்டத்தில் வெண்கல பதக்கம் வென்றார். அதேவேளை, ஊட்டியில் நடந்த தமிழ்நாடு காதுகேளாதோருக்கான சாம்பியன்ஷிப்பில் 110 மீட்டர் மற்றும் 400 மீட்டர் தடைதாண்டும் ஓட்டங்களில் தங்கப் பதக்கம் வென்று புதிய சாதனை படைத்தார்.
இந்துாரில் நடைபெற்ற தேசிய அளவிலான சாம்பியன்ஷிப் போட்டியில் தடைதாண்டும் ஓட்டத்தில் தங்கப் பதக்கம் பெற்று, அவர் தனது திறமையை மேலும் வெளிப்படுத்தினார். மேலும், 2024ம் ஆண்டு, மலேசியாவில் நடைபெற்ற ஆசிய பசுபிக் காது கேளாதோருக்கான சர்வதேச தடகளப் போட்டியில் 110 மீட்டர் தடைதாண்டும் ஓட்டத்தில் வெள்ளிப் பதக்கம் வென்றார்.
கார்த்திக்கின் பெற்றோர் மகாலிங்கம் மற்றும் விஜி, அவரது வளர்ச்சிக்கு என்றும் உதவிக் கொண்டு ஊக்கமளிக்கின்றனர். பயிற்சியாளர்களும் விளையாட்டு ஆர்வலர்களும் அவருக்கு தொடர்ந்து ஆதரவளித்து வருகின்றனர். தற்போது, டோக்கியோவில் நடைபெறவுள்ள டிப்லிம்பிக்ஸ் போட்டிகளுக்கான தீவிர பயிற்சியில் ஈடுபட்டுள்ளார்.
