துரைமுருகன் இல்லத் திருமணத்தில் சமஸ்கிருத மந்திரங்களுடன் புரோகித சடங்குகள்: திராவிடர் கழகம் கடும் கண்டனம்

திமுக பொதுச்செயலாளர் துரைமுருகனின் இல்லத்தில் நடைபெற்ற குடும்பத் திருமண விழாவில் சமஸ்கிருத வேத மந்திரங்கள் ஓதப்பட்டு புரோகித முறையில் சடங்குகள் நடைபெற்றதாக எழுந்துள்ள விவகாரம் தமிழக அரசியல் வட்டாரத்தில் பெரும் விவாதத்தை ஏற்படுத்தியுள்ளது. இந்த நிகழ்வுக்கு திராவிடர் கழகத் தலைவர் கி.வீரமணி கடும் கண்டனம் தெரிவித்துள்ளார்.

பெரியார் மற்றும் அண்ணா ஆகியோரைத் தலைவர்களாகக் கொண்ட திராவிட இயக்கத்தின் முக்கியப் பொறுப்பில் இருப்பவர், அந்த இயக்கத்தின் அடிப்படைக் கொள்கைகளிலிருந்து விலகலாமா என்று கேள்வி எழுப்பியுள்ள கி.வீரமணி, தனிமனிதர்களைவிட இயக்கமும், இயக்கத்தைவிட அதன் கொள்கைகளும் முக்கியம் என்று வலியுறுத்தியுள்ளார். இதுதொடர்பாக அவர் வெளியிட்ட அறிக்கையில் திமுக தலைமை இந்த விவகாரத்தில் கவனம் செலுத்த வேண்டும் என்றும் கேட்டுக்கொண்டுள்ளார்.

துரைமுருகன் குடும்பத் திருமணத்தில் எழுந்த சர்ச்சை

திமுக பொதுச்செயலாளர் துரைமுருகனின் பேத்தியும், வேலூர் நாடாளுமன்ற உறுப்பினர் கதிர் ஆனந்தின் மகளுமான செந்தாமரைக்கும், தீபக் ரவிக்கும் சென்னையில் நவம்பர் 1ஆம் தேதி திருமணம் நடைபெற்றது.

இந்தத் திருமண விழாவுக்கான அழைப்பிதழில் திமுக தலைவர் மு.க.ஸ்டாலின் தலைமையில் திருமணம் நடைபெறுவதாகக் குறிப்பிடப்பட்டிருந்தது. மேலும், பெரியார், அண்ணா, கருணாநிதி, மு.க.ஸ்டாலின் உள்ளிட்ட தலைவர்களின் படங்களும் இடம்பெற்றிருந்ததாக கி.வீரமணி தனது அறிக்கையில் சுட்டிக்காட்டியுள்ளார்.

இந்த நிலையில், திருமணத்தில் சமஸ்கிருத வேத மந்திரங்கள் ஓதப்பட்டு புரோகித முறையில் சடங்குகள் நடைபெற்றதாக செய்திகள்

சுப.வீரபாண்டியன், செந்தில்குமார் விமர்சனம்

இந்தத் திருமணம் தொடர்பாக திராவிட இயக்க தமிழர் பேரவையின் தலைவர் பேராசிரியர் சுப.வீரபாண்டியன் தனது சமூக வலைதளப் பதிவில் அதிருப்தி தெரிவித்துள்ளார்.

துரைமுருகன் தன்னிடம் பேரன்பு காட்டுபவர் என்றும், அவரது இல்லத் திருமணத்தில் சமஸ்கிருத மந்திர ஒலி கேட்டது தனது இதயத்தை வலிக்கச் செய்ததாகவும் அவர் குறிப்பிட்டுள்ளார்.

இதேபோல், திமுக முன்னாள் நாடாளுமன்ற உறுப்பினர் டாக்டர் செந்தில்குமாரும் திருமண நிகழ்வு குறித்து விமர்சித்துள்ளார். மேடைகள் தோறும் சுயமரியாதைத் திருமணங்களைப் பிரகடனப்படுத்தும் கொள்கைப் பிடிப்புள்ள இயக்கத்தில், அந்தக் கொள்கையைப் பின்பற்றும் வாய்ப்பைத் தவறவிட்டது தனிப்பட்ட முறையில் தமக்கு உடன்பாடில்லை என்று அவர் தெரிவித்துள்ளார்.

இந்த விமர்சனங்கள் சமூக வலைதளங்களில் விவாதத்தை மேலும் தீவிரப்படுத்தின.

கி.வீரமணி வெளியிட்ட கடும் கண்டன அறிக்கை

இந்த விவகாரம் தொடர்பாக திராவிடர் கழகத் தலைவர் கி.வீரமணி வெளியிட்ட அறிக்கையில், திமுக பொதுச்செயலாளர் இல்லத்திலேயே சமஸ்கிருத வேத மந்திரங்கள் முழங்க புரோகிதத் திருமணம் நடைபெற்றதாக வெளியான செய்தி தங்களுக்கு வேதனையையும் வெட்கத்தையும் ஏற்படுத்தியுள்ளதாகக் குறிப்பிட்டுள்ளார்.

மேலும், துரைமுருகன் குடும்பத்தில் புரோகித முறையில்தான் திருமணம் நடத்த வேண்டும் என்ற முடிவு இருந்திருந்தால், அதனை வெளிப்படையாகத் தெரிவித்திருக்கலாம் என்றும் அவர் கூறியுள்ளார். திமுக தலைவர் தலைமையில் நடைபெறுவதாக அழைப்பிதழ் வெளியிட்டு, அதே நிகழ்வில் இயக்கத்தின் அடிப்படைக் கொள்கைகளுக்கு மாறான சடங்குகள் இடம்பெற்றிருப்பது ஏன் என்றும் கேள்வி எழுப்பியுள்ளார்.

துரைமுருகன் நீண்டகாலமாக திமுகவில் பணியாற்றி வரும் மூத்த தலைவர் என்பதால், இத்தகைய நிகழ்வு அவரது பொதுவாழ்க்கைக்கும் இயக்கத்தின் நற்பெயருக்கும் பாதிப்பை ஏற்படுத்தக்கூடும் என்றும் அறிக்கையில் தெரிவித்துள்ளார்.

சுயமரியாதைத் திருமணத்தின் வரலாற்றைச் சுட்டிக்காட்டிய திராவிடர் கழகம்

தந்தை பெரியார் அறிமுகப்படுத்திய சுயமரியாதைத் திருமண முறைக்கு, அண்ணா முதலமைச்சராக இருந்தபோது சட்ட அங்கீகாரம் வழங்கியதை கி.வீரமணி தனது அறிக்கையில் நினைவுபடுத்தியுள்ளார்.

சமஸ்கிருத மந்திரங்கள் மற்றும் புரோகிதச் சடங்குகளைத் தவிர்த்து, மணமக்களின் சம உரிமை, சுயமரியாதை மற்றும் பகுத்தறிவை முன்னிறுத்தும் வகையில் சுயமரியாதைத் திருமண முறை உருவாக்கப்பட்டது என்பது திராவிட இயக்கத்தின் நிலைப்பாடாகும்.

இந்தக் கொள்கைகளை அடிப்படையாகக் கொண்டு உருவான திமுகவில், பொதுச்செயலாளர் போன்ற முக்கியப் பொறுப்பில் இருப்பவர் தனது குடும்ப நிகழ்விலும் அதே கொள்கைகளைப் பின்பற்ற வேண்டிய பொறுப்பு உள்ளதாக கி.வீரமணி வலியுறுத்தியுள்ளார்.

தனிமனிதர்களைவிட இயக்கம் முக்கியம் என்றும், இயக்கத்தைவிட அதன் கொள்கைகளும் லட்சியங்களும் மிக முக்கியம் என்றும் அவர் குறிப்பிட்டுள்ளார்.

திமுக தலைமைக்கு கி.வீரமணி வலியுறுத்தல்

இந்த விவகாரம் தொடர்பாக திமுக தலைவர் மு.க.ஸ்டாலின் கவனம் செலுத்த வேண்டும் என்றும் கி.வீரமணி கேட்டுக்கொண்டுள்ளார்.

கட்சியின் கொள்கைகளுக்கு முரணான இதுபோன்ற இரட்டை நிலைப்பாடுகள் எதிர்காலத்தில் தொடராமல் தடுக்க வேண்டியது அவசியம் என்று அவர் தெரிவித்துள்ளார். திமுகவின் பகுத்தறிவு மற்றும் சுயமரியாதைக் கொள்கைகளுக்கு பாதிப்பு ஏற்படாத வகையில் கட்சித் தலைமை கவனத்துடன் செயல்பட வேண்டும் என்றும் வலியுறுத்தியுள்ளார்.

துரைமுருகன் குடும்பத் திருமணத்தைத் தொடர்ந்து எழுந்துள்ள இந்த விவகாரம், திமுகவின் கொள்கை நடைமுறை மற்றும் தலைவர்களின் தனிப்பட்ட குடும்ப நிகழ்வுகள் தொடர்பான விவாதத்தை மீண்டும் தமிழக அரசியல் களத்தில் முன்னிலைப்படுத்தியுள்ளது.