கொடைக்கானல் நகராட்சிக்கு உட்பட்ட வடக்கு வனப்பகுதியில் குப்பைகள் குவிக்கப்பட்டதாக எழுந்த புகார் தற்போது பெரும் விவாதமாகியுள்ளது. சுற்றுச்சூழல் பாதுகாப்பு மற்றும் வனப்பகுதி பாதுகாப்பு தொடர்பாக கவலை அளிக்கும் இந்த சம்பவம், பொதுமக்கள் மத்தியில் அதிருப்தியை ஏற்படுத்தியுள்ளது. குறிப்பாக பிரகாசபுரம் பகுதியை ஒட்டிய வனப்பகுதியில் சுமார் 20 மீட்டர் பரப்பளவில் குப்பைகள் மலைபோல் குவிந்துள்ளதாக புகார் எழுந்தது.
இந்த நிலையில், பொதுமக்கள் அளித்த புகாரின் அடிப்படையில் மாவட்ட வன அலுவலர் யோகேஷ் குமார் மீனா சம்பவ இடத்திற்கு நேரில் சென்று ஆய்வு மேற்கொண்டார். ஆய்வின் போது, வனப்பகுதியை ஆக்கிரமித்து குப்பைகள் கொட்டப்பட்டுள்ளதை அவர் உறுதிப்படுத்தினார். இதனை தொடர்ந்து, குப்பைகளை உடனடியாக அகற்ற வேண்டும் என நகராட்சி அதிகாரிகளுக்கு கடும் எச்சரிக்கை விடுக்கப்பட்டது. மூன்று நாட்களுக்குள் குப்பைகள் முழுமையாக அகற்றப்படவில்லை என்றால் சம்பந்தப்பட்ட அதிகாரிகள் மீது சட்டப்படி நடவடிக்கை எடுக்கப்படும் என்றும் அவர் தெரிவித்தார்.
இதன் தொடர்ச்சியாக வனத்துறை சார்பில் கொடைக்கானல் நகராட்சிக்கு அதிகாரப்பூர்வ நோட்டீஸ் அனுப்பப்பட்டது. வனப்பகுதியில் குப்பை கொட்டப்படுவது வனச் சட்டங்களுக்கு எதிரானது என்றும், இது சுற்றுச்சூழலுக்கு கடும் பாதிப்பை ஏற்படுத்தும் என்றும் வனத்துறை குறிப்பிட்டுள்ளது. குறிப்பாக மலைப்பகுதிகளில் குப்பைகள் தேங்கி இருப்பதால் மழைக்காலங்களில் அவை கீழ்ப்பகுதிகளுக்கு அடித்து செல்லும் அபாயம் உள்ளதாகவும் எச்சரிக்கை விடுக்கப்பட்டுள்ளது.
அதே நேரத்தில், நகராட்சி அதிகாரிகள் தங்களது விளக்கத்தில், குப்பைகள் திட்டமிட்டு வனப்பகுதியில் கொட்டப்படவில்லை என்றும், குப்பைக் கிடங்கில் சேகரிக்கப்பட்ட குப்பைகள் கனமழையின் காரணமாக சரிந்து வனப்பகுதிக்குள் சென்றதாகவும் தெரிவித்துள்ளனர். இதனால் ஏற்பட்ட தவறான நிலைமை எனவும், குப்பைகள் அகற்ற நடவடிக்கை எடுக்கப்பட்டு வருவதாகவும் அவர்கள் கூறியுள்ளனர்.
இந்த விவகாரத்தில் வனத்துறை உதவி வன பாதுகாவலர் கருப்பையா வெளியிட்டுள்ள தகவலில், மாவட்ட வன அலுவலரின் ஆய்வின் போது விதிமீறல்கள் கண்டறியப்பட்டதாகவும், அதனை தொடர்ந்து சட்டப்படி நடவடிக்கை எடுக்க உத்தரவிடப்பட்டுள்ளதாகவும் தெரிவித்தார். நகராட்சி மற்றும் வனத்துறை இடையே ஏற்பட்டுள்ள இந்த கருத்து வேறுபாடு தற்போது பொதுமக்கள் மத்தியில் கேள்விகளை எழுப்பியுள்ளது.
மலைப்பகுதிகளில் பாதுகாப்பாக நிர்வகிக்கப்பட வேண்டும் எனக் கூறப்படும் குப்பைகள் எவ்வாறு வனப்பகுதிக்குள் குவிந்தன என்பது குறித்து தெளிவான விளக்கம் தேவைப்படுவதாக சமூக ஆர்வலர்கள் வலியுறுத்தி வருகின்றனர். சுற்றுச்சூழல் பாதுகாப்பு தொடர்பாக உரிய நடவடிக்கை எடுக்கப்பட வேண்டும் என்றும், இனி இதுபோன்ற சம்பவங்கள் நடைபெறாத வகையில் நிரந்தர தீர்வு காண வேண்டும் என்றும் பொதுமக்கள் கோரிக்கை விடுத்துள்ளனர்.
