பெண்களின் பொருளாதார முன்னேற்றத்தையும், சுற்றுச்சூழலுக்கு உகந்த தொழில் வாய்ப்புகளையும் மேம்படுத்தும் நோக்கில் தேசிய சணல் வாரியம் சார்பில் சணல் பை தயாரிப்பு பயிற்சி முகாம் கொடைக்கானலில் தொடங்கப்பட்டது. இந்த பயிற்சி திட்டம் சுயதொழில் தொடங்க விரும்பும் பெண்கள் மற்றும் இளம் தொழில் முனைவோருக்கு திறன் மேம்பாட்டு வாய்ப்பை வழங்கும் நோக்கத்துடன் ஏற்பாடு செய்யப்பட்டுள்ளது.
கொடைக்கானலில் உள்ள ஜேசி ரெசிடென்சி வளாகத்தில் நடைபெற்ற தொடக்க விழாவில் ஏராளமான பெண்கள், இளைஞர்கள் மற்றும் தொழில் முனைவோர் ஆர்வத்துடன் கலந்து கொண்டனர். நிகழ்ச்சியில் தேசிய சணல் வாரியத்தின் உதவி இயக்குநர் மௌசுமி பாண்டே மற்றும் இந்திய பொருளாதார சேவையை சேர்ந்த உதவி இயக்குநர் உமா சந்திரிகா ஆகியோர் சிறப்பு விருந்தினர்களாக பங்கேற்று பாரம்பரிய குத்துவிளக்கை ஏற்றி பயிற்சி முகாமை தொடங்கி வைத்தனர்.
நிகழ்ச்சிக்கு ஃபெட்கிராட் அரசு சாரா அமைப்பின் நிர்வாக இயக்குநர் எம்.ஏ. சுப்புராமன் தலைமை வகித்து உரையாற்றினார். பெண்கள் தொழில் முனைவோராக உருவாக திறன் மேம்பாட்டு பயிற்சிகள் முக்கிய பங்காற்றுகின்றன என்றும், சணல் பொருட்களுக்கு உள்நாட்டிலும் வெளிநாடுகளிலும் அதிகரித்து வரும் சந்தை வாய்ப்புகளை பயன்படுத்திக் கொள்ள வேண்டும் என்றும் அவர் வலியுறுத்தினார்.
தொடக்க நிகழ்ச்சியில் பேராசிரியர் டாக்டர் எம். கண்ணன் சிறப்புரையாற்றினார். இயற்கை வளங்களை பாதுகாக்கும் நோக்கில் பிளாஸ்டிக் பொருட்களுக்கு மாற்றாக சணல் பொருட்களின் பயன்பாடு நாளுக்கு நாள் அதிகரித்து வருவதாகவும், சணல் பை தயாரிப்பு சிறந்த வருமானம் தரக்கூடிய சிறு தொழிலாக வளர்ந்து வருவதாகவும் அவர் தெரிவித்தார்.
நிகழ்ச்சியில் கிருஷ்ணவேணி, எஸ். அங்குசாமி, சாரல் ரூபி மற்றும் மும்பையை சேர்ந்த ஆர். கண்ணன் உள்ளிட்டோர் கலந்து கொண்டனர். தொடர்ந்து நடைபெற்ற கலந்துரையாடல் நிகழ்ச்சிக்கு கொடைக்கானல் ரோட்டரி சங்கத் தலைவர் சன்னி ஜேக்கப் தலைமை வகித்தார். இதில் பங்கேற்றவர்கள் சணல் பொருட்கள் உற்பத்தி, சந்தைப்படுத்தல், தரநிலை பராமரிப்பு மற்றும் தொழில் வளர்ச்சி தொடர்பான அனுபவங்களை பகிர்ந்து கொண்டனர்.
பயிற்சி முகாமில் மதுரையை சேர்ந்த டிராவல் இன் நிறுவனத்தின் நிர்வாக இயக்குநர் எம். சார்லஸ், கொடைக்கானல் யூனியன் வங்கியின் மூத்த மேலாளர் ஆர். முருகேசன், ப்ரோவீஸ் நிறுவன உரிமையாளர் எம். எஸ். சாந்தி மற்றும் ஃபெட்கிராட் அமைப்பின் ராட் ஆலோசகர் எஸ். ஜி. கணேஷ் ஆகியோரும் கலந்து கொண்டு பெண்களின் வாழ்வாதாரத்தை மேம்படுத்துவதில் சணல் பொருட்கள் முக்கிய பங்கு வகிப்பதாக கருத்து தெரிவித்தனர்.
சணல் பொருட்கள் சுற்றுச்சூழலுக்கு பாதிப்பு ஏற்படுத்தாத இயற்கை சார்ந்த பொருட்களாக இருப்பதால் அவற்றின் பயன்பாடு உலகளவில் அதிகரித்து வருகிறது. இந்த நிலையில் சணல் பை தயாரிப்பு தொடர்பான திறன் மேம்பாட்டு பயிற்சிகள் பெண்களுக்கு புதிய வேலைவாய்ப்புகளையும் தொழில் தொடங்கும் வாய்ப்புகளையும் உருவாக்கும் என்று நிகழ்ச்சியில் பங்கேற்றவர்கள் தெரிவித்தனர்.
தேசிய சணல் வாரியத்தின் இந்த பயிற்சி திட்டம் மூலம் பெண்கள் சணல் பைகள் தயாரிக்கும் தொழில்நுட்பம், தயாரிப்பு தரம், சந்தைப்படுத்தல் முறைகள் மற்றும் தொழில் மேலாண்மை தொடர்பான நடைமுறை பயிற்சிகளை பெறவுள்ளனர். இந்த முயற்சி பெண்களின் பொருளாதார தன்னிறைவை ஊக்குவிப்பதுடன், சுற்றுச்சூழலுக்கு உகந்த தயாரிப்புகளின் பயன்பாட்டையும் அதிகரிக்கும் என்று எதிர்பார்க்கப்படுகிறது.