சேலம், நவ 29 – சேலம் அரசு மருத்துவக் கல்லூரி மருத்துவமனையில் சிறுவனின் மூச்சுக் குழாயில் சிக்கிய குண்டூசியை மருத்துவர்கள் பாதுகாப்பாக அகற்றிய சாதனையை நிகழ்த்தினர்.
இந்த விவகாரத்தில் சேலம் அரசு மருத்துவமனையின் டீன், தேவி மீனாள், நிருபர்களிடம் கூறியதாவது:
சேலம் மாவட்டம் தாரமங்கலம் பகுதியைச் சேர்ந்த சத்யா என்பவரின் 13 வயது மகன் செல்வம் (13) கடந்த 26-ஆம் தேதி அசாதாரணமான வகையில் குண்டூசியை முழுங்கி விட்டார். இதைக் கண்ட குடும்பத்தினர் அதிர்ச்சியடைந்து, சிறுவனை மீட்டு சேலம் அரசு மருத்துவக் கல்லூரி மருத்துவமனையில் உடனடியாக அனுமதித்தனர்.
அப்போது மருத்துவர்கள் பரிசோதனை செய்தபோது, செல்வத்தின் வலது நுரையீரலில் மூச்சுக் குழாயில் நீண்ட குண்டூசி சிக்கியதை கண்டறியப்பட்டது. இதையடுத்து அவசரமாக அறுவை சிகிச்சைக்கு ஏற்பாடு செய்யப்பட்டது.
காது, மூக்கு, தொண்டை துறையின் தலைமை பேராசிரியர் கிருஷ்ணசுந்தரி தலைமையில், மயக்கவியல், கதிரியக்க, இருதயம் மற்றும் நுரையீரல் அறுவை சிகிச்சை நிபுணர்களை கொண்ட குழு, நவீன டெலிப்ரான்கோஸ்கோப் கருவி மூலம் மூச்சுக் குழாயில் சிக்கிய 3 செண்டிமீட்டர் அளவிலான குண்டூசியை பாதுகாப்பாக அகற்றியது.
மருத்துவக் குழுவினருக்கு சிகிச்சை வெற்றிகரமாக முடிந்ததைத் தொடர்ந்து, தேவி மீனாள் அவர்கள், "இந்த மருத்துவ குழுவினருக்கு எனது பாராட்டுகளைத் தெரிவித்துக் கொள்கிறேன்" என தெரிவித்தார்.
சேலம் அரசு மருத்துவமனை எப்போதும் அருகிலுள்ள மாவட்டங்களில் இருந்து அதிகளவு குழந்தைகளை சிகிச்சைக்காக வரவேற்கின்றது. குறிப்பாக, நிலக்கடலை விதைகள், பிளாஸ்டிக் விசில் கூறிய ஊசிகள், மற்றும் உள்புற ஊக்குகள் போன்றவை தொண்டை பகுதியில் சிக்கிக் கொண்டதால், ஆறு வயதுக்குட்பட்ட குழந்தைகள் வருவதாக தெரிவிக்கப்பட்டுள்ளது. இத்தகைய பொருட்கள் மூச்சுக் குழாயில் சிக்கியதால், சில நேரங்களில் உயிருக்கு ஆபத்தாக மாறக்கூடும்.
குழந்தைகள் இதுபோன்ற பொருளை சாப்பிட்டுவிடும் போது பயமோ பதட்டமோ கொள்ளாமல் உடனடியாக அருகிலுள்ள அரசு மருத்துவமனைக்கு சென்று சிகிச்சை பெற வேண்டும் என அவர் வலியுறுத்தினார்.
இந்தச் சந்தர்ப்பத்தில் மருத்துவ கண்காணிப்பாளர் ராஜ்குமார், உள்தங்கு மருத்துவ அலுவலர் ஸ்ரீலதா, கிருஷ்ணசுந்தரி மற்றும் பிற மருத்துவர்கள் உடன் இருந்தனர்.
