காரைக்குடியில் நடைபெற்ற நிகழ்ச்சியில் எம்.பி. கார்த்தி சிவகுமார் பல்வேறு கருத்துகளை வெளியிட்டார். அவர் கூறியதாவது, மாவட்டத்தில் கால்நடை மருத்துவமனை அமைக்க முதல்வரிடம் வலியுறுத்த உள்ளதாக தெரிவித்தார். சென்னை ஐ.ஐ.டி இயக்குனர் காமகோடி கூறிய கருத்து பதவிக்கேற்ப இல்லாதது எனவும், விஞ்ஞான சான்றுகள் இல்லாமல் கோமியம் குடிப்பதை பரிந்துரை செய்தது தவறு என்றும் அவர் கண்டனம் தெரிவித்தார்.
அதன் பின்னர், தமிழகத்தில் பரந்தூர் சர்வதேச விமான நிலையம் குறித்து அவர் கருத்து வெளியிட்டார். சென்னை விமான நிலையம் மிக மோசமாக உள்ளதாகவும், புதிய விமான நிலையம் அவசியம் என்றும் கூறினார். மத்திய மற்றும் மாநில அரசுகள் இதற்கு ஒத்துழைப்பு அளித்து செயல்படுவதை தொடர்ந்து, அதனைத் தடை செய்வது சரியில்லை என அவர் வலியுறுத்தினார்.
மேலும், த.வெ.க தலைவர் விஜய் தமிழக வளர்ச்சிக்கு எதிராக கருத்து தெரிவிப்பதாகக் குற்றம் சாட்டிய அவர், பரந்தூர் விமான நிலையம் குறித்து நிதி அமைச்சர் தெளிவாக விளக்கமளித்துள்ளார் என கூறினார். துணைவேந்தர்கள் நியமன விவகாரம் குறித்து அவர், ஆளுநர் தீர்வு காணவில்லை என்றால் உச்ச நீதிமன்றம் தீர்வு காணும் என்பதில் நம்பிக்கை உள்ளதாக தெரிவித்தார்.
