தூத்துக்குடி சட்டமன்றத் தொகுதிக்குட்பட்ட அண்ணாநகர் பகுதியில் பொதுமக்களின் நலன் கருதி புதிய ரேஷன் கடை கட்டும் பணிக்கான பூமிபூஜை விழா நடைபெற்றது. சமூகநலன் மற்றும் மகளிர் உரிமைத்துறை அமைச்சரும், தூத்துக்குடி வடக்கு மாவட்ட திமுக செயலாளருமான திருமதி கீதாஜீவன் இந்த நிகழ்வை தொடங்கி வைத்தார்.
அண்ணாநகர் பகுதியில் கடந்த சில ஆண்டுகளுக்கு முன்பு நடைபெற்ற பொதுமக்கள் குறைதீர்க்கும் முகாமில், அப்பகுதியைச் சேர்ந்த மக்கள், தங்களிடம் அதிக எண்ணிக்கையிலான ரேஷன் கார்டுகள் இருந்தாலும், அருகில் ரேஷன் கடை இல்லாத காரணத்தால் புதிய பேருந்து நிலையம் அருகே செல்ல வேண்டிய நிலை இருப்பதை வலியுறுத்தினர். இதனால் முதியவர்கள் மற்றும் பெண்கள் போக்குவரத்து தடைபாடுகள் காரணமாக சிரமம் அனுபவிக்கின்றனர் என்று மனு அளித்தனர். இந்த கோரிக்கையை அமைச்சா் பதிலளித்து நடவடிக்கை எடுக்க உறுதியளித்திருந்தார்.
இதன் தொடர்ச்சியாக, சில மாதங்களுக்கு முன்பு டூவிபுரம் பகுதியில் உள்ள சட்டமன்ற உறுப்பினர் அலுவலகத்தில் தூத்துக்குடி வேளான் உற்பத்தியாளர் கூட்டுறவு விற்பனை சங்கத்தின் சார்பில் தற்காலிக ரேஷன் கடை நிறுவப்பட்டு பொதுமக்களுக்கு சேவை வழங்கப்பட்டது.
இந்நிலையில், மக்கள் வசதிக்காக நிரந்தரமான புதிய ரேஷன் கடையை அமைக்க தீர்மானிக்கப்பட்டது. அதற்காக சட்டமன்ற உறுப்பினர் மேம்பாட்டு நிதியில் இருந்து ரூ.14.40 லட்சம் ஒதுக்கப்பட்டுள்ளது. இந்த நிதியுடன் புதிய கடை கட்டும் பணிக்கான பூமிபூஜை விழா நடைபெற்றது. அமைச்சர் கீதாஜீவன் சூரிய நமஸ்காரம் செய்து பூஜையுடன் செங்கல் எடுத்து கட்டுமான பணியை தொடங்கிவைத்தார். பின்னர் பணிகள் சிறப்பாகவும் நேரத்தில் முடிக்கப்பட வேண்டும் என்றும் அவர் உத்தரவிட்டார்.
இவ்விழாவில் தூத்துக்குடி வட்டார வளர்ச்சி அலுவலர் ஹைகோர்ட் மகாராஜா, உதவி பொறியாளர் ரவி, மாநகர திமுக செயலாளர் ஆனந்தசேகரன், பகுதி செயலாளர் ரவீந்திரன், இலக்கிய அணி அமைப்பாளர் ஜீவன் ஜேக்கப், இளைஞர் அணி அமைப்பாளர் அருண்சுந்தர், மாவட்ட அணி தலைவர் பழனி, வட்டச் செயலாளர்கள் டென்சிங் செந்தில்குமார், வட்டப்பிரதிநிதிகள் கார்த்திகேயன், ராஜ், கணேசன், பாஸ்கர், துணைச் செயலாளர் சபேசன், அவைத்தலைவர் ராஜ்மோகன் உள்ளிட்ட பலர் கலந்து கொண்டனர்.
அமைச்சரின் இந்த நடவடிக்கை, அப்பகுதி மக்களிடையே மிகுந்த வரவேற்பைப் பெற்றுள்ளது. புதிய ரேஷன் கடை கட்டி முடிக்கப்படும் போது, அண்ணாநகர் மற்றும் சுற்றுவட்டாரப் பகுதிகளில் வசிக்கும் பொதுமக்கள் பயன்பெறுவதோடு, அத்தியாவசிய பொருட்கள் பெறுவதற்கான சிரமமும் குறையும் என எதிர்பார்க்கப்படுகிறது.
