திண்டுக்கல் மாவட்டத்தில் உள்ள அரசு பள்ளிகளில் 11ம் வகுப்பில் உயர்ந்த மதிப்பெண்கள் பெற்ற மாணவ, மாணவிகள் விஞ்ஞான விழிப்புணர்வை மேம்படுத்தும் நோக்கில் சிறப்பு களப்பயணத்திற்கு அனுப்பப்பட்டுள்ளனர். மாவட்ட ஆட்சியர் அலுவலகம் மற்றும் திண்டுக்கல் கல்வி அறக்கட்டளை இணைந்து இந்த பயணத்தை ஏற்பாடு செய்துள்ளன.
தேர்வில் சிறந்த மதிப்பெண்கள் பெற்ற 50 மாணவர்கள் ஸ்ரீஹரிகோட்டா செல்லும் வாய்ப்பு பெற்றுள்ளனர். அவர்கள் நாளை மாலை 5.30 மணிக்கு நாசா மற்றும் இஸ்ரோ இணைந்து உருவாக்கிய நிசார் செயற்கைக்கோளை விண்ணில் ஏவும் நிகழ்வை நேரில் காண உள்ளனர். இச்செயற்கைக்கோள் சுற்றுச்சூழல் மற்றும் பூமியின் வளங்களை ஆய்வு செய்வதற்காக உருவாக்கப்பட்டுள்ளது. இது மாணவர்களுக்கு உயர்தர அறிவியல் மற்றும் விண்வெளி ஆராய்ச்சியை நேரடியாக அனுபவிக்க முடியும் வகையில் ஒரு அரிய வாய்ப்பாக கருதப்படுகிறது.
பயணத்தின் தொடக்க விழா திண்டுக்கல் மாவட்ட ஆட்சியர் அலுவலகத்தில் நடைபெற்றது. மாவட்ட ஆட்சியர் திரு சரவணன் அவர்கள் மாணவர்களுக்கு வெள்ளைக் கொடி காட்டி பயணத்தை தொடங்கிவைத்தார். இதில் பல்வேறு அதிகாரிகள், பள்ளி முதல்வர்கள் மற்றும் பெற்றோர்களும் கலந்து கொண்டனர். மாணவர்கள் இந்த வாய்ப்பை பெருமையுடன் ஏற்று, எதிர்காலத்தில் விண்வெளி, அறிவியல் மற்றும் தொழில்நுட்ப துறைகளில் சாதனை படைக்க வேண்டும் என்ற உறுதியுடன் பயணத்தைத் தொடங்கினர்.
திண்டுக்கல் கல்வி அறக்கட்டளை சார்பில் மாணவர்களுக்கான போக்குவரத்து, தங்கும் இடம் மற்றும் உணவுகள் போன்ற அடிப்படை வசதிகள் அனைத்தும் ஏற்பாடு செய்யப்பட்டுள்ளன. மேலும் இந்த பயணத்திற்கான பாதுகாப்பு மற்றும் வழிகாட்டல் பணிகளில் மாவட்ட கல்வி அலுவலர்கள் பங்கேற்கின்றனர்.
மாணவர்களுக்கு இவ்வகையான நேரடி அனுபவம், விண்வெளி தொழில்நுட்பங்களைப் பற்றி விரிவாக அறிய உதவுகிறது. இந்த அனுபவம் மூலம் மாணவர்கள் அறிவியல் மீது உள்ள ஆர்வத்தை வளர்த்துக்கொண்டு எதிர்காலத்தில் இஸ்ரோ, டிஆர்டிஓ போன்ற முன்னணி ஆய்வுத் துறைகளில் பங்களிக்க வழிவகுக்கும் என்று கல்வி வட்டாரங்கள் தெரிவித்தன.
மாணவர்களின் எதிர்கால முன்னேற்றத்திற்காக மாநில அரசு மற்றும் மாவட்ட நிர்வாகம் மேற்கொண்ட இந்த முயற்சி பாராட்டுதலுக்குரியது. இது போன்ற பயணங்கள் ஊக்குவிக்கப்பட்டால் அரசு பள்ளி மாணவர்களின் திறமைகள் மேலும் வெளிப்படும் என்பதில் சந்தேகம் இல்லை.
