இந்தியாவில் கோடை வெப்பத்தின் தாக்கம் நாளுக்கு நாள் அதிகரித்து வரும் நிலையில், அடுத்த ஒரு வாரத்திற்கு வெப்பநிலை மேலும் உயரக்கூடும் என இந்திய வானிலை ஆய்வு மையம் எச்சரிக்கை விடுத்துள்ளது. வட இந்தியா முதல் தென் இந்தியா வரை பல மாநிலங்களில் கடும் வெப்பம் நிலவி வருவதால் பொதுமக்கள் கடும் அவதியை சந்தித்து வருகின்றனர்.
உத்தரப் பிரதேசம் உள்ளிட்ட வட மாநிலங்களில் அதிக வெப்பநிலை பதிவாகியுள்ளது. உத்தரப் பிரதேசத்தின் சில பகுதிகளில் நேற்று 118 டிகிரி ஃபாரன்ஹீட் வரை வெப்பநிலை உயர்ந்ததாக தகவல் வெளியாகியுள்ளது. இதனால் மக்கள் பகல் நேரங்களில் வெளியே செல்ல சிரமப்படுகின்றனர். சாலைகள் வெறிச்சோடிய நிலையில் காணப்பட்டதுடன், பல இடங்களில் குடிநீர் தேவை அதிகரித்துள்ளது.
தெலங்கானா மாநிலத்தின் கம்மம் பகுதியில் 116 டிகிரி ஃபாரன்ஹீட் வெப்பநிலை பதிவாகியுள்ளது. அதேபோல் ஆந்திரப் பிரதேசத்தின் பாப்பட்லா பகுதியில் கடும் வெப்பம் நிலவியதால் மக்கள் மிகுந்த சிரமத்தை எதிர்கொண்டனர். தலைநகர் டெல்லியிலும் 113 டிகிரி ஃபாரன்ஹீட் வரை வெப்பநிலை உயர்ந்துள்ளதாக வானிலை ஆய்வு மையம் தெரிவித்துள்ளது.
தமிழ்நாட்டிலும் வெப்பத்தின் தாக்கம் அதிகரித்து வருகிறது. மாநிலத்தின் பல மாவட்டங்களில் 100 டிகிரி ஃபாரன்ஹீட்டிற்கு மேல் வெப்பநிலை பதிவாகியுள்ளது. குறிப்பாக வேலூர் மாவட்டத்தில் அதிகபட்சமாக 109 டிகிரி ஃபாரன்ஹீட் வெப்பநிலை பதிவாகியுள்ளது. திருத்தணி பகுதியில் 108 டிகிரி ஃபாரன்ஹீட் வெப்பநிலை பதிவாகியுள்ள நிலையில், ஈரோட்டில் 105 டிகிரி ஃபாரன்ஹீட் வரை வெப்பம் உயர்ந்துள்ளது.
மேலும் திருச்சி, கரூர், பரமத்தி மற்றும் மதுரை உள்ளிட்ட பகுதிகளில் 104 டிகிரி ஃபாரன்ஹீட் வெப்பநிலை பதிவாகியுள்ளது. மதுரை விமான நிலையப் பகுதியில் 103 டிகிரி ஃபாரன்ஹீட் வெப்பநிலை பதிவானதாக தெரிவிக்கப்பட்டுள்ளது. தர்மபுரி, தஞ்சாவூர் மற்றும் நாமக்கல் மாவட்டங்களில் 102 டிகிரி ஃபாரன்ஹீட் வரை வெப்பம் பதிவாகியுள்ளது.
சென்னை நகரின் சில பகுதிகளிலும் கடும் வெப்பம் நிலவியது. மக்கள் அதிக வெப்பத்தால் உடல்நல பாதிப்புகளை சந்திக்கக்கூடும் என்பதால், மதிய நேரங்களில் வெளியே செல்ல வேண்டாம் என மருத்துவர்கள் அறிவுறுத்தியுள்ளனர். குழந்தைகள், முதியவர்கள் மற்றும் உடல்நல குறைபாடு உள்ளவர்கள் கூடுதல் கவனத்துடன் இருக்க வேண்டும் என்றும் எச்சரிக்கப்பட்டுள்ளது.
அடுத்த சில நாட்களில் வெப்பநிலை மேலும் அதிகரிக்கக்கூடும் என்பதால், பொதுமக்கள் போதிய அளவு தண்ணீர் குடிப்பது, நீர்ச்சத்து நிறைந்த உணவுகளை எடுத்துக்கொள்வது மற்றும் நேரடி வெயிலை தவிர்ப்பது அவசியம் என வானிலை ஆய்வு மையம் தெரிவித்துள்ளது.