இந்தியாவில் கோடிக்கணக்கான மக்கள் தினசரி பயன்படுத்தும் வாட்ஸ்அப் செயலியின் தனியுரிமைக் கொள்கை தொடர்பாக உச்ச நீதிமன்றம் கடும் கருத்துகளை தெரிவித்துள்ளது. மெட்டா நிறுவனத்தின் கீழ் செயல்படும் வாட்ஸ்அப், பயனர்களின் தனிப்பட்ட தரவுகளை பகிர்வதாக எழுந்த குற்றச்சாட்டுகள் தொடர்பான வழக்கு தற்போது உச்ச நீதிமன்றத்தில் விசாரணைக்கு வந்துள்ளது.
இந்த வழக்கு இந்திய போட்டி ஆணையம் எடுத்த நடவடிக்கைகளின் தொடர்ச்சியாகும். வாட்ஸ்அப் மற்றும் மெட்டா நிறுவனங்கள் தங்களின் ஆதிக்கத்தை தவறாக பயன்படுத்தியதாக போட்டி ஆணையம் கண்டறிந்தது. இதனைத் தொடர்ந்து இரு நிறுவனங்களுக்கும் ரூபாய் 213 கோடி 14 லட்சம் அபராதம் விதிக்கப்பட்டது. மேலும், தனியுரிமைக் கொள்கையில் மாற்றங்களை மேற்கொள்ள வேண்டும் என்றும் ஆணையம் உத்தரவிட்டது.
இந்த உத்தரவை எதிர்த்து மெட்டா மற்றும் வாட்ஸ்அப் நிறுவனங்கள் உச்ச நீதிமன்றத்தில் மேல்முறையீடு செய்தன. இந்த மனு தலைமை நீதிபதி சூரியகாந்த் தலைமையிலான நீதிபதிகள் அமர்வில் விசாரணைக்கு வந்தது. விசாரணையின் போது, பயனர்களின் தனிப்பட்ட தரவுகள் பாதுகாப்பு குறித்து நீதிமன்றம் கடும் கேள்விகளை எழுப்பியது.
நீதிபதிகள், சாதாரண பயனர்கள் புரிந்து கொள்ள முடியாத அளவுக்கு சிக்கலான தனியுரிமை விதிமுறைகள் உருவாக்கப்பட்டுள்ளதாகக் கருத்து தெரிவித்தனர். தனியுரிமை என்ற பெயரில் பயனர்களின் தகவல்களை பகிர்வதை ஒருபோதும் அனுமதிக்க முடியாது என்றும் கூறினர். இந்திய சட்டங்களுக்கு உட்பட்டு செயல்பட முடியாவிட்டால், அந்த நிறுவனங்கள் நாட்டை விட்டு வெளியேறலாம் என்ற வகையில் கடும் எச்சரிக்கையும் விடுக்கப்பட்டது.
இந்தியாவில் சுமார் 40 சதவீத மக்கள் வாட்ஸ்அப்பை அன்றாட தகவல் பரிமாற்றத்திற்கும், வணிக தொடர்புகளுக்கும், கோப்பு பகிர்வுகளுக்கும் பயன்படுத்தி வருகின்றனர். வாட்ஸ்அப் இல்லாத வாழ்க்கையை நினைத்துப் பார்க்க முடியாத நிலை உருவாகியுள்ளது. அதனால் வாட்ஸ்அப் மீது ஏதேனும் தடை அல்லது கட்டுப்பாடு விதிக்கப்பட்டால், தகவல் தொடர்பு மற்றும் வணிக நடவடிக்கைகளில் பெரும் தாக்கம் ஏற்படும் என்ற அச்சம் எழுந்துள்ளது.
அதே நேரத்தில், டெலிகிராம், சிக்னல் போன்ற மாற்று செயலிகளும் இருப்பதாக தொழில்நுட்ப நிபுணர்கள் சுட்டிக்காட்டுகின்றனர். இருப்பினும், வாட்ஸ்அப் அளவிற்கு பரவலாக பயன்படுத்தப்படும் செயலி எதுவும் தற்போது இல்லை என்பது குறிப்பிடத்தக்கது.
இந்த வழக்கில் இறுதி தீர்ப்பு வழங்கப்படவில்லை என்பதால், விசாரணை அடுத்த தேதிக்கு ஒத்திவைக்கப்பட்டுள்ளது. உச்ச நீதிமன்றத்தின் இந்த கடும் எச்சரிக்கை, இந்தியாவில் பயனர்களின் தனியுரிமை பாதுகாப்பு குறித்த முக்கியமான விவாதத்தை மீண்டும் முன்வைத்துள்ளது. வருங்காலத்தில் மெட்டா மற்றும் வாட்ஸ்அப் நிறுவனங்கள் எந்த வகையான நடவடிக்கைகளை எடுக்கப் போகின்றன என்பதை அனைவரும் கவனமாக எதிர்நோக்கி வருகின்றனர்.
