தென்னிந்திய திரையுலகின் முன்னணி நடிகர்களில் ஒருவரான ராம் சரண், ஆர்.ஆர்.ஆர் வெற்றிக்கு பின் இயக்குனர் ஷங்கர் இயக்கிய கேம் சேஞ்சர் திரைப்படத்தில் நடித்து வரவேற்பை பெற்றுள்ளார். இப்படத்தில் கியாரா அத்வானி முக்கிய கதாபாத்திரத்தில் நடித்துள்ளார். மேலும், தமிழில் பல வெற்றிப் படங்களை இயக்கிய இயக்குனர் கார்த்திக் சுப்புராஜ், இப்படத்திற்கான திரைக்கதையை எழுதியுள்ளார்.
ஐஏஎஸ் அதிகாரியாக நடிக்கும் ராம் சரண் மற்றும் ஊழல் அரசியல்வாதிகளுக்கிடையிலான அதிகாரப் போராட்டத்தை மையமாக கொண்டுள்ள இப்படம், சிறந்த அரசியல் சமூக கருத்துக்களை வெளிப்படுத்தியுள்ளது. கடந்த 10-ம் தேதி வெளியான இப்படம் ரூ.200 கோடிக்கு மேல் வசூலித்து, வரலாற்று சாதனையை நிகழ்த்தியுள்ளது.
இந்த நிலையில், இயக்குனர் கார்த்திக் சுப்புராஜ் இப்படத்தை பாராட்டி தனது சமூக வலைதளத்தில் பதிவு செய்துள்ளார். அதில் அவர், "கேம் சேஞ்சர் ஷங்கர் சாரின் மாஸ் மற்றும் பிரமாண்டமான அரசியல் திரைப்படமாக உள்ளது. இப்படத்தின் அரசியல் வசனங்கள் கவனம் கவரும் வகையில் அமைந்துள்ளன. இப்படத்தின் ஒரு சிறிய பகுதியாக இருந்ததை பெருமையாகக் கருதுகிறேன். ராம் சரண் மற்றும் எஸ்.ஜே. சூர்யாவின் அபாரமான நடிப்பு, திருவின் ஒளிப்பதிவு, தமன் இசை உள்ளிட்ட அனைத்து அணியினருக்கும் வாழ்த்துகள்," என தெரிவித்துள்ளார்.
கேம் சேஞ்சர் திரைப்படம் தமிழ் திரையுலகில் மட்டுமல்லாது தென்னிந்திய சினிமாவிலும் மிகப்பெரிய வெற்றியாக அமைந்துள்ளது.