'கண்ணப்பா' திரைப்படம் சிவ பக்தனான கண்ணப்பரின் ஆன்மிகக் கதையை மையமாகக் கொண்டு உருவாக்கப்பட்ட பான் இந்தியா படம் ஆகும். பிரபல மகாபாரத தொடரை இயக்கிய முகேஷ் குமார் சிங் இப்படத்தை இயக்கியுள்ளார். தெலுங்கு நடிகர் விஷ்ணு மஞ்சு கண்ணப்பர் கதாபாத்திரத்தில் நடிக்க, பிரபாஸ் சிவனாகவும், மோகன்லால், அக்ஷய் குமார் உள்ளிட்ட பிரபலங்கள் முக்கிய வேடங்களில் நடித்துள்ளனர். அக்ஷய் குமார் இப்படத்தின் மூலம் தனது முதல் தெலுங்கு திரைப்படத்தையும் அறிமுகம் செய்கிறார்.
3-வது நூற்றாண்டின் இயற்கை அழகை பிரதிபலிக்க இதற்கான படப்பிடிப்பு நியூசிலாந்தில் நடைபெற்றது. இதைப் பற்றிச் சிலர் கேட்ட கேள்விக்குப் பதிலளித்த நடிகர் விஷ்ணு மஞ்சு, "அந்தக் காலத்தில் நீர், காற்று, வனம் என அனைத்தும் எவ்வளவு பசுமையாக இருந்திருக்கும் என்பதை நினைத்துப் பாருங்கள். நியூசிலாந்தின் இயற்கை அழகே இதற்கான சரியான இடமாக இருந்தது. படத்தில் நீங்கள் பார்க்கும் லொக்கேஷன்கள் அனைத்தும் உண்மையானவை; கிராபிக்ஸ் அல்ல," என்றார்.
விஷ்ணு மஞ்சு மேலும், "தமிழில் நடித்திடும் கனவு இந்தப் படத்தின் மூலம் நிறைவேறியது. சரத்குமாருடன் இணைந்து நடிப்பது என் நீண்டநாள் ஆசை," என்றும் தெரிவித்தார்.
'கண்ணப்பா' ஏப்ரல் 25-ம் தேதி தமிழ், தெலுங்கு, ஹிந்தி, கன்னடம், மலையாளம் ஆகிய மொழிகளில் வெளியிடப்பட உள்ளது.